خەڵات و ڕێزلێنان لە چالاکوانانی ئەدەبی کوردیی منداڵان

پۆستەری ڕێزلێنان لە چالاکوانانی ئەدەبی کوردیی منداڵان، وەشانخانەی ٤٩ کتێب ٢٠٢٦: منداڵێکی وێنەکێشراو کە کتێبێکی کراوەی بە دەستەوەیە

وەشانخانەی ٤٩کتێب – ٢٠٢٦

وەشانخانەی ٤٩کتێب بە شانازییەوە بەڕێوەچوونی یەکەمین خولی «ڕێزلێنان لە چالاکوانانی ئەدەبی کوردیی منداڵان» ڕادەگەیەنێت. ئەم دەستپێشخەرییە هەنگاوێکە بۆ بەرزنرخاندنی هەوڵە داهێنەر و دڵسۆزانەکانی ئەو ئازیزانەی لەپێناو دەوڵەمەندکردنی دنیای ئەدەبی منداڵاندا تێ دەکۆشن؛ بەو هیوایەی ببێتە هەوێنێک بۆ ڕێزلێنان لە دەستکەوتەکانیان و جۆشدانی بەهرەی قەڵەمە نوێ و نوێخوازەکان.

لە سەردەمێکدا کە ئەدەبی کوردیی منداڵان ڕووبەڕووی جۆرێک لە ئاڵۆزی و شێواوی بۆتەوە ـ کە تێیدا بەرهەمی نەشیاو و بازرگانیکردن بە ناوی ئەدەبی منداڵانەوە بەدی دەکرێت ـ خۆشبەختانە کەسانێک بە ورەیەکی بەرز و ماندوونەناسانە بوونەتە مەشخەڵداری ئەم ڕێگەیە و سەلماندوویانە کە بە ئیرادە و تێکۆشان دەکرێت بەرەو لووتکە هەنگاو بنرێت. لەم سۆنگەیەوە، ئاوڕدانەوە لەم هەوڵە پڕبایەخانە و پشتگیریکردنی چالاکوانان، بە ئەرکی سەرشانی هەموو دامەزراوەیەکی فەرهەنگی و یەک‌بەیەکی خەمخۆرانی ئەدەبی کوردی دەزانین.

لە بەردەوامیی ئەم ئەرکەدا، وەشانخانەی ٤٩کتێب سەری ڕێز و خۆشەویستی بۆ تێکۆشەرانی ئەدەبی منداڵان دادەنەوێنێت و لە یەکەمین خولدا ڕێز لە ۱۰ چالاکوان و وێژەری دیاری ئەم بوارە دەگرێت، بەو هیوایەی ئەم نەریتە پیرۆزە لە ساڵانی داهاتووشدا بەردەوام بێت.

ناوی خەڵاتکراوان:

بەشی چیرۆک

سەیوان سەعیدیان: بۆ نووسینی کتێبی «چی بکەین ئەوانی تر ببنە پاشا».

خەجێ ڕێدوور (Xecê Rêdûr): بۆ نووسینی کتێبی «Mêşan Siyaset Xwar» (مێشان سیاسەت خوار).

هێمن هۆزان: بۆ نووسینی کتێبی «ئەم لاپەڕانە شوێنی تۆ نین».

بەشی شیعر

محەممەد ڕەسووڵ‌نیا: بۆ نووسینی کتێبی «پەپوولە پاییزە».

یەحیا عەلەوی‌فەرد (Yehya Elewîferd): بۆ نووسینی کتێبی «Perav» (پەراڤ).

بەشی ڕێزلێنانی تایبەت

ئاکۆ محەممەد سابیر: بۆ تەمەنێک تێکۆشان و خزمەت لە بوارەکەیدا.

شاناز جەوانشیر، بێهناز جەوانشیر و حسێن جەوانشیر: بۆ توێژینەوەی ئەدەبی و نووسینی کتێبی «خولیاکانی کەوشەنی با».